|
||||||||||||||
| Autoren | ∞ | Werke | ∞ | Neu | ∞ | Information | ∞ | Shop | ∞ | Lesetips | ∞ | Textquelle | ∞ | |
|
|
||||||||||||||
| Autoren | ∞ | Werke | ∞ | Neu | ∞ | Information | ∞ | Shop | ∞ | Lesetips | ∞ | Textquelle | ∞ | |
Anzeige. Gutenberg Edition 16. 2. vermehrte und verbesserte Auflage. Alle Werke aus dem Projekt Gutenberg-DE. Mit zusätzlichen E-Books. Eine einmalige Bibliothek. +++ Information und Bestellung in unserem Shop +++
| Tau Bramborg wahnt en ollen Jud, De hadd schir so vel Geld as Meß; Hei hungerte un döst, indeß Hei ümmer mihr tausamen schrapen ded Un Stück för Stück up hoge Kant henläd. De Oll, de hadd dat Eten fast versworen, Un ümmer kakt dat olle Krut, Blot üm dat beten Holt tau sporen, Sin Eten up drei Dag vörut. Na, einmal hadd hei dicke Arwten Sick up drei Dag in vörut kakt Un sick dortau so'n lütten unbedarwten Un drögen Hiring ut mit Water lakt. Na, wenn bi Sommertid de dickten Arwten Heww'n in 'ne dump'ge Kamer legen, Un dat drei Dag' hendörch bi Dag un Nacht, Denn kann nich jeder sei verdrägen. So vel is wohr: wer't mag, de magt, Un wer't nich mag, de mag't jo woll nich mägen. Ick bün woll hartfratsch, Vaddermann, Doch mit so'n Arwten stah ick nich mit an. Na, as hei nu de Arwten ded probieren, Dunn markt denn ok dat olle Kreatur. Dat sei nich blot en beten sur, Ne, dat sei ok all muchlich wiren. Hei prauwt und prauwt; doch wull't em nich gelingen, En lütten Happen run tau bringen; Sei wullen em dörchut nich gliden. Na, Schaden wull hei ok nich liden, So gung hei endlich tau en Schapp un nem 'ne Buddel ruter mit en Käm Un schenkte sick en Gläsken in Un sprak tau sick in sinen Sinn: »As du ißt de Erbsen, Levi, As du kriggst en kleinen Kümmel; As du nicht de Erbsen ißt, As du nicht den Kümmel kriggst.« Un somit kratzt hei af den Schimmel, De äwerall all up de Arwten stunn, Un frat de suren Arwten run. Un höll dorup den Sluck an't Licht Un makt en fründliches Gesicht Un lickmünn't säut un grint em tau. Doch as hei nahdacht hett in Rauh, Dat hei den Sluck woll sporen künn, Dunn got hei'n nah de Buddel rin. »Da hab ich«, seggt dat olle Dirt, »Den alten Levi angeführt!« |