Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Fritz Reuter

De Urgeschicht von Meckelnborg

Drüddes Kapittel

Von dat Paradis

Hir erinnere ick mi de itzigen Würd' von den seligen Eddelmann, hei seggt: »Äwer de Lag' von dat Paradis is all öltlings vel streden worden, äwer nah de bestimmten Nahrichten von minen Öllervader Noah un nah de Meinung von mine ganze Fomili un unsere ganze Sippschaft was dat Paradis in Meckelnborg un is ok noch hüt un desen Dag dor, wenigstens för de Ridderschaft.« Un ok ick stimm dorin mit den seligen Eddelmann tausam; äwer Meckelnborg is grot, in wecker Gegend lagg denn nu de Paradisgoren? Doch woll dor, wo dat tauirst drög worden is un wo de irsten Minschen makt sünd, bi Groten-Bäbelin, Serrahn un Krakow, so recht middwarts in Meckelnborg. Äwer ick heww noch mihr Grün'n för dese Behauptung, denn irstens is de Düwel up kein Flag in Meckelnborg up Stun'ns noch so begäng' as in dit verlorene Paradis, wo hei sin irstes un niderträchtigstes Hauptstück utäuwt hett; un tweitens erinnere ick mi, dat ick in mine Schauljohren mit Korl Kräugern tausam mang de Schüns von Krakow mal 'ne olle halw verwischte Tafel funnen heww, dor kunn einer noch lesen:

                 Kain     darf
hier       rauchen
Feuer schlagen
               wahren
                       abel.

Wat mines Wissens woll nich anners tau lesen is as: Kain traf hier seinen Bruder und sah sein Opfer rauchen und gen Himmel das Feuer schlagen, und ehe sich dieser dagegen konnte verwahren, erschlug er den Abel. Mi dücht, dit is Bewis naug, un Korl Kräuger kann mi dat betügen. – Ick heww frilich woll hürt, dat hei sick doräwer lustig makt hett un hett vertellt, hei hadd den ollen seligen Senator Wecker in Krakow dornah fragt, un de hadd em seggt, hei hadd de Tafel sülwst schrewen, un dor hadd up stahn: Kainer darf hier mang die Scheunen Toback rauchen oder gar Feuer schlagen bei zwei Thaler Strafe.« Un en beten unnerwarts hadd stahn:

»Weg nach Wahren und Jabel.«

Äwer ick möt dorbi seggen: Korl Kräuger was in jungen Johren sihr lichtglöwig, un de Herr Senator Wecker was en Spaßvogel. – Mihr segg ick nich! Un wer nich mine Ansicht is, de mag mi von't Gegendeil äwerführen!

Wat süs noch in den Paradisgoren passiert is, weit jeder Minsch, un wenn hei dat anners nich weiten süll, denn kann hei dat an sick sülwst seihn, indem dat hei dagdäglich ümmer noch in den sülwigen Appel bitt, den Eva anbeten hett.

För Adammen was't äwer slimm, hei kamm von't Pird up den Esel, hei was as Eddelmann inset't worden un müßt as Bur mit en witten Stock dorvon gahn. Äwer wo is hei blewen? Dat is de Frag'.

De Stolper Handschriwwt seggt utdrücklich, hei is nah Jabel hentau gahn un hett sick dor up den Kleiacker en lütten Katen bugt. – Hüren lett sick dat, denn eigentlich was de Jabelsche Preisteracker sin richtiges Vaderland, von wegen den Leim, ut den hei kned't was; un denn stunn noch bet verleden Johr vör den groten Brand in Jabel oll Bur Bummgoren sin einhischig Katen mit de Ümschrift:

Wider will ick doräwer nicks nich seggen; denn so'ne Unnersäukungen mägen von grote Wichtigkeit sin; äwer den'n, de sei makt, warden sei hellschen sur.Dat glöw ick sacht! Angripen deiht so wat, un bi den Stand von de Wissenschaften tau den seligen Eddelmann sine Tiden müggten so'ne Unnersäukungen ok just woll noch nich nödig sin; up Stun'ns äwer möt allens unnersöcht warden, gründlich unnersöcht warden, süs leggt einer mit sin Bauk in den Nettel. – Un dor stellt sick denn tauirst de wichtige Frag' herut: Wat redten Adam un Eva för 'ne Sprak? – Weck seggen »Hebräsch«; kann ick äwer nich bipflichten, denn Adam was ganz säker kein Jud', hei hett keinen Laden un kein Bankgeschäft hatt, hei was en einfachen Ackersmann. – Also, »Hebräsch« is nich, äwer wat? Üm hir up den Grund tau kamen, möt wi up de Städen taurügg gahn, wo tauirst von Spraken de Red' is, un dat is de Sprakverbisternis bi den Babylonischen Torm. Dejenige Sprak nu äwerst, de am meisten von dese Bisternis bibehollen hett, möt also woll de öllste sin un ward ok wohrschinlich von Adam un Eva red't sin, un dat is de – pladdütsche; denn dorin is noch so'ne Bisternis, dat dat en Hund jammern kann un dat sogar min Fründ, de Herr Avkat Hobein, vör Johren all up den minschenfründlichen Infall kamen is, en pladdütschen Schriftsteller-Kongreß tausam tauberaupen, dat doch dit babylonische Elend mal uphüren ded. 't is schad, dat dor nicks ut worden is; 't wir ok woll en Babylonschen Torm worden.

Ick heww vel äwer Adammen sine Sprak lesen un vele Bäuker doräwer nahslagen, heww äwersten nicks Bestimmtes funnen; blot ein oll Smöker beseggt stiw un fast – bewisen deiht hei't äwer ok nich -, de irsten Würd', de Adam red't hadd, wiren west: »Eving, giww mi en lütten Kuß!«