Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Kummenalgarde.

De Schännecker soong, 's wär in Adorf geweesen und de Adörfer schiems wieder af de Schännecker, bȧȧde ober wer'n bies, wenn ȧȧns ahfängt und derziehlt dervah. Iech glȧȧbs ober in' ganzen Leem net, aß de Sach überhaupt in' Vugtland gepassiert hot, doderzu sei unnere Vugtlänner ze »helle«. Wer wȧß wus war, emende is de ganze Geschicht gar net wahr und es hot se ner su ȧ Zeitingsschreiber aus ne Fingern gesuhng. Obers werd eem derziehlt und iech derziehls wieder.

Der Künig Johann, Gott ho ne selig, war als Prinz Kummandant vun der Kummenalgarde geweesen, Gott ho se selig. Wer sche noch gekennt hot, den kimmts Lachen heit noch ah, wenn er ner ne Name härt. Er sieht se noch in Gedanken vur siech stiehe. Den ȧn'n in ȧn'n schwarzen, ȧn'n annern in ȧn'n grooe oder blooe Schwenker, und wieder ȧn'n annern in ȧn'n kurzen Sackröckel, wie dozemol de heiting Schacketts gehissen wur'n, alle ober mit der gleing brȧȧten grü und weißen Kummenalgardenbind drah ne linken Arm und mit der gleing steifen Mütz vun Glanzleeder mit grußmächting Leederdach af ne Kopf. Wie steif und doch mit weller Forsche ham se ben Exerziern de Bȧȧ geschlenkert und de Flinten – denn Flinten, mit dene m'r sugar schießen kunnt, hatten se ȧȧ – vun der Achsel roh- und wieder naufgeschmissen. Und die ȧrnsthafting Gesichter, die se gemacht ham derbei! M'r kunnt wȧßettersch denken, aß se meitog nix annerschts gedacht und gemacht hätten, als wie schießen und stechen und Leit mordsakeriern. Und doch hätt ȧ ȧȧnzge Korperalschaft vun richting Saldaten ȧ ganz Regiment dervah in de Flucht goong könne. Dös hȧȧßt, iech will de Leit fei net schlecht machen, und in grässern Steedten sohng se emende scha ȧ weng merner wie Saldaten aus und warn se ȧ weng strammer und eechahler, ober in klȧnnern Nestern, ach, du lieber Gott!

Also der Künig Johann war als Prinz Kummandöhr vun der Kummenalgarde in Sachsen geweesen und hatt se be Geleenget do und dorte geinspiziert. Nu war er Künig wur’n, is nooch und nooch in’ ganzen Land rümgerȧȧst, üm siech sȧn'n Volk ze zeing und selber noochzeseh, wus epper fehlet, und hot be dere Geleenget ȧȧ siech nooch seiner Kummenalgarde ümgeseh. Su is er ȧȧ af Schänneck oder Adorf kumme, oder weil die zwȧȧ Steedtle doch außer Frog stenne, wöll’ m’r'sch Nest mȧntweeng Driespitz hȧȧßen.

Der Börgermȧȧster hatt vun' Hȧrrn Amtshauptmann Noochricht kriegt, aß und wenn der Künig käm, und der hatt nu fix alles ahgericht', wos m’r ne huhchen Hȧrrn vurführn wott, natürlich ȧȧ de Kummenalgarde, die siech haußen vur ne Tur af der Stroß aufstelln sott, aß er die gleich verneh ze Gesicht krieget.

Der Kummandant vun der Kummenalgarde, ȧ alter gedienter Korperal und itze Balbierer, ließ zito seine Leit in' wahrschten Sinn vun' Wort z’sammtrommeln, aß er sche orntlich eiühm wott af ne huhng Besuch. Jo, ober dös hatt seine Hoken. Sinst hatten siech seine Kriegsleit z'sammgestellt, wie se gerod wotten, ganz eechahl aß ȧ grußer neem an'n klȧn'n oder ȧ fetter Moppel neem ȧn'n Windhund ze stiehe kam.

Er hatts wuhl ben erschten Ahfang net su zugeem, hatt se nooch der Grüß aufstelln wölln wie ben Saldaten, ober do war er net durchkumme dermiet. Be ȧn'n klȧn'n Schmied, der net viel ze bedeiten hatt, hatt er sȧn'n Kopf durchgesetzt; ober wos war wur'n? Der hatt sieter dere Zeit sei Balbierstum nimmer betreeten, hatt siech wu annerschter balbiern und siech und sȧn'n Gungen de Haar be ȧn'n annern ohschern loßen. Af die Weis' hätt er zeletzt de ganze Kundschaft eibüßen könne. Nȧȧ, nȧȧ, dös war dös weng Kummenalgarde net wert. Erscht kam er mit sȧn'n Geschäft. Also hatt er ne Leiten ihrn Will geloßen. Ober nu, wu der Künig kam, nu gahngs freilich net annerschter, itze mußt nu fix Ordning geschafft wer'n.

Doch gleich ben erschten Ahfang wur dös Ding hȧȧß. Ȧ dicker Flȧȧscher, der sugar miet ben Stadtrat war, net gerod exter klȧȧ, su ȧ klȧȧner Mittelmah, war bis itze Flügelmann geweesen. Der Balbierer wott nu ne Längsten derzu nemme, dös war der Essenkehrer. Der ober wott net naufrucken, weil er gedacht hot, der Flȧȧscher, den er dreihunnert Toler Geld schullig war, könnts übelnemme und ihn noochert üm sei Geld ȧȧschen. Und der Flȧȧscher selber hot behaupt', er gähng net vun sȧn'n Platz weg. Wär er bis itze gut genungk derzu geweesen, teet er siech nu itze ȧȧ net verdränge loßen. Und der Balbierer, der ben Stadtrat üm de Kunzession ze ȧ weng Bierschänkerei eikumme war, wotts mit ne Hȧrrn Stadtrat net verdȧrm, und su blieb der Flȧȧscher eem Flügelmann. Der Essenkehrer ober kam als Zwȧȧter neem ihn nah. Neem den hatt bis itze der Zahs-Bäck sȧn'n Platz gehatten, ȧ klȧȧner, fetter Moppel, der vun Rechts weeng af ne äußerschten annern Flügel gemüßt hätt. Der ober ließ siechs ȧȧ wieder net eireden, aß er weing müsset. Der Essenkehrer wär meitog sei Nachbar geweesen, und su gut wie der dicke Flȧȧscher sȧn'n Kopf aufsetzen könnet, su gut hätt er'sch Recht ȧȧ derzu, er gähng eem net vun sȧn'n schwarzen Nachbar weg. Und der Korperol hot wieder zeletzt noochgeem.

Und wie ben Flȧȧscher und ben Bäck, su gahngs ȧȧ be ne mernsten annern, jeder hatt ȧn'n annern Grund: der Schuster wott net neem'e Woonger nah, weil der nix be ihn ȧrweten ließ, der Schneider war mit den bies, neem den er siech stelln sott, und der Schieferdecker hatt scha vun sȧn'n leding Gahrne her sȧn'n Bittern af ne Gloser, weil der'n amol benah sȧn'n Schatz ohspenstig gemacht hatt; neem den stellet er siech üm kȧn'n Preis net, lieber –. Wos er lieber wött, hot er net gesogt.

Der Balbierer is wie olber ȧ ganze Weile hie- und hergerannt, endlich hot er ȧn'n Ausweeg gefunne. »Also«, sogt er, »heit is nix wȧtter ze ta. Morng noochmittig üm viere, ober mit ne Punk, treeten m'r wieder ah. Itze rechts um! und marsch fort!« Dermiet war der Dienst fer heit aus.

Ne annern Tog, pünklich, su zwischen vertel- und halbfümfe, kumme se noochenanner ahgebummelt. Der Balbierer war wos ehser kumme und hatt ȧ Hack und ȧ Schaufel mietgebracht. Wie se alle besamm warn, hieß er sche ahtreeten, noochert soget er: »Horcht ah! Ihr wott net, wie iech will und wies nooch der Ordning sei müßt. Ober su, Kraut und Ruhm unner enanner, dös gieht ȧȧ net; drüm müssen m'r'sch annerschter machen. Du, Essenkehrer, bist viel ze lang neem'e Flȧȧscher; da! do hoste de Haue, grob d'r ȧ klȧȧns Loch fer deine Füß! Und dorte vun den Stȧȧhaufen hulst'e d'r noochert ȧ paar gruße Stȧȧ! Die legst'e vorn ah, aß m'r'sch net sieht, wu de Füß stecken!«

Und noochert wendt er siech zen Bäckenmoppel: Du ober hulst d'r ȧ paar Stȧȧ, die derzu passen, zen Naufstelln, und vorn, dohierte is de Schaufel, schaufelst'e ȧ weng Erden nah und legst ȧ paar Rosenstückle vür, aß m'r de Stȧȧ net sehe kah! Noochert, denk iech, werds zer Nut wuhl giehe.« Su stellt er ȧȧ de annern ah, wos ze lang is, macht er körzer und wos ze kurz is länger, wie scha in' graue Altertum der Ries' Prokustes bis sei Kumpenie ahne Todel dostieht; wenn m'r noong'e Mützen und noong'e Nosen ȧ Schnur vun' erschten bis zen letzten ziehe teet, do wär nerngst net ȧ Uteeterle ze viel oder ze weng. Ȧȧ de Flinten müssen se dernooch halten, ȧȧner de Arm ȧ weng merner ahziehe, der annere ȧ weng merner strecken, noochert ham ȧȧ die gepaßt.

Noochert hot er ȧȧnige Gewehrgriff machen loßen: »Gewehr bei Fuß! Gewehr auf! Gewehr auf Schulter! Präsentiert 's Gewehr!« Und wie dös su leidlich geklappt hot, noochert, sogt er: »Su, nu merkt eich eier Fleckel orntlich, aß m'r uns morng net epper auslachen loßen müssen!« Dermiet läßt er sche eirücken.

Und ne annern Vürmittig, ȧ halbe Stunn zevur, eh der Künig ahgesogt is, hot jeder sei Plätzel eigenumme, der Essenkehrer und de Lange in ne Löchern, der Bäckenmoppel und de annern Kurzen af ihrn Stȧnnen, wie ses ne Tag zevur geprobiert hatten.

Af der annern Seit vun der Stroß stunden de Schulkinner mit ihrn Lehrern und af ne rechten Flügel vun der Kummenalgarde stelleten siech der Börgermȧȧster mit ne Stoodtveetern und der Paster und der Dokter mit ne Aptheker auf.

Af ȧȧmol hießs: »Itze kumme se!« De Lehrer schaue fix noch amol ihre Kinner durch, der Börgermȧȧster wischt siech noch amol ne Angstschwȧȧß vun der Stern, tritt nüber af de Mitt in der Stroß und hält ne Hut in der Händ. Verneh kumme zwȧȧ Kutschen mit annern Hȧrrn. In der vöderschten is der Amtshauptmann und noch ȧȧner und in der zwȧȧten sitzen Saldaten. Der Amtshauptmann rieft in ȧn'n fort: »Schreit hurrä! ihr Leute, schreit hurrä!« In 'ne dritten Woong erscht sitzt der Künig, ihn geengüber zwȧȧ Offezier.

Der Börgermȧȧster tritt nah ne Woong und hält ȧ kurze Ahsprooch, schwenkt zeletzt ne Hut und schreit: »Seine Majestät, unser König Johann, lebe hoch!« Und Kinner und Gruße schwenken de Hüt und de Mützen und schreie miet. Noochert fährt der Woong ȧ paar Schriett hie und hält ber Kummenalgarde wieder ah.

»Achtung! Präsentiert das Gewehr!« kummandiert der Balbierer.

Der Künig macht ihne sei Hornöhr, lacht ober ȧ weng und sogt wos ze ȧn' vun den Offeziern, die af ne Rücksitz sitzen. Dodrauf beigt siech ȧȧner vun ihne ȧ weng zen Woong naus und sogt zen Korperal: »Majestät wünscht, daß sie etwas exerzieren lassen.« Sufort läßt der Korperal de gelȧrnten Griff kloppen, die ȧȧ wahrlich gar net schlecht gahnge.

Der Künig stießt mit Lachen den Offezier nei de Seit und sogt noch wos, wudrauf der zen Balbierer sogt: »Lassen sie doch auch mal marschieren!«

Mit Tudesverachting schreit der Kummandant, er wȧß, wos nu passiert, ober der Künig hots befuhln, also muß's sei: »Vorwärts! Marsch!«

Und die af eemer Erd stunden, setzeten ne linken Fuß vür, wies befuhln war, ober der Essenkehrer und de annern Lange mußten erscht aus ihrn Löchern rauskrakeln und der Bäck und seine Kumpane erscht vun der Hitsch rohspringe, wuderbei der ȧȧne Moppel gar noch's Malleer hatt, zen Sterzen kam und mit sȧn'n Gewehr längedeläng hie de Stroß plȧȧschet. De ganze Kumpanie stellet in ihrn Wirrwarr ȧn'n Ahblieck dar, der net ze beschreim is und den m'r siech ner vürstelln kah, wenn m'r bȧȧde Ȧȧng fest zudrückt und siech noochert in de Sachlog neidenkt. Der Künig lacht gerodnaus und beigt siech orntlich krumb und hält de Händ vur'sch Gesicht, aß m'r'sch net su sehe soll, und gibbt ȧn'n Wink, aß der Kutscher zufahrn söll. – – –

Der Korperal ober, der sinst su vürsichtig in sȧn'n Reden war, aß er gu kȧn’n epper ze nah treeten wott, der reißt ȧn'n Dammich und ȧȧ Schock Duhnerwetter noong'e annern raus, und Schofköpf und dumme Hund und Hȧȧochsen und Brumm- und Schiebochsen sei ne zen Maul rausgeporzelt, aß er ne ganzen Viehmarkt in Plaue hätt dermiet ahfülln könne. Und omst ham ne der Essenkehrer und der Schuster hȧmgetroong, lȧȧfen kunnt er nimmer, er war unner den vieln Viechern selber ȧȧns wur'n und ȧȧns, vun dene m'r mit ne geringsten Respekt redt.