Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Kȧȧ Getȧȧfts.

In der säckschen Schweiz sölls gepassiert sei. Iech ho ȧȧ 's Ort nenne hörn, wills ober ne Wert weeng lieber net verroten.

Der alte gute Künig Johann war, ner mit ȧn'n Adjetanten, bis af Schandau mit der Bah gefahrn. Weil 's Wetter gar su sehr schie war, hatt er Lust ze ȧn'n wȧttern Spaziergang kriegt und war mit sȧn'n Begleiter noch ȧ Stunn weit ze Fuß bis naus af ȧ Dorf geloffen, 's war ȧ hȧȧßer schwüler Summertog in' Juni und der Künig hatt Dorscht kriegt. Er mȧȧnet dereweeng zen Hȧrrn Majur, se wötten in ne Wertshaus ȧ Gleesel Bier trinken.

Also kehrn se ei und setzen siech haußen unner 'er grußen Lind, üm die ȧ paar Breetter ze 'er Art vun Tisch z'sammgenagelt warn hie af de Bänk. Itze kimmt ȧ Gung vun ȧ Gahrer elfen, zwölfen geloffen, – de annern Leit warn alle draußen auf der Wies' zen Hȧȧd – und fregt, wos sei söll.

»Bitte, zwei Glas Bier!« sogt der Künig. Der Gung lȧȧft eilig fort und brängt nooch zwȧȧ Minuten zwȧȧ Gleeser getroong. Gar ze appetitlich sohgs net aus, Ȧȧng hots gemacht wie Kuhȧȧng und de Gleeser warn geschweppert voller bis zen äußerschten Rand, zen Überlȧȧfen. Der Künig hot ober tüchting Dorscht gehatten, er hot ȧ Schlückel genumme und der Adjetant mußt wuhl oder übel ȧȧ Beschȧȧd ta. Gleichgiltig is der Gung mit der Mütz af ne Kopf derneem stiehe gebliem, wie wenns gar nix wȧtter wär.

Itze freegt'n der Adjetant: »Kennst du den hohen Herrn hier nicht?« Dermiet weist er af ne Künig.

»Nȧȧ,« sogt der Gung und schaut nauf de Lind nooch ȧ paar Staarne, die dorte Fangeles machen.

»Nun da will ich dirs sagen: das ist Seine Majestät unser allergnädigster König und Herr.«

»Is 's wahr?« fregt der Gung mit grußaufgerissene Ȧȧngen.

»Freilich, wenn iechs sage!«

Do, m'r kahs net su fix derziehln, wies gescheh is, springt der Gung hie zen Tisch, packt de zwȧȧ Bierseidle und rennt dermiet fort. Der Adjetant wills ne wehrn, ober doderzu is er viel ze steet, der Gung is fort, eh er siech recht besunne hot. Der Hȧrr Majur is fix in de Höh gesprunge und will ne Gunge enooch. Ober der Künig faßt ne ben Arm ah, hält ne zerück und sogt mit Lachen: »Lassen sie nur, die Sache wird sich schon aufklären.«

Gleich drauf härn se drinne klopfen, wie wenn der Spund aus ȧn'n Fässel geschloong wür und nooch 'er klȧn'n Weile kimmt mei Gung wieder mit zwȧȧ Seidlen und setzt se hie ne Tisch. Itze hots Bier gelacht, wie Millich stund der Schȧȧm zwȧȧ Finger dick drauf, dös war ganz annere Worscht wie vurte. Wuhlgefellig hält der Künig sei Glos geeng de Sunn und fregt ne Gunge: »Warum hast du denn die vorigen Gläser wieder fortgetragen, mein Sohn?«

Und der Gung sogt in volln Eifer mit ȧ weng Lachen af ne Maullippen: »Ne Künig derf m'r kȧȧ Getȧȧfts geem!«