| |
Oh, wann ih nur koa Bauernbua waar!
's Bauernbua sei is halt gar aso schwaar!
Allaweil fahrn, ja fahrn,
mit'n Mistkarrn, ja Karrn,
da muaß ma allaweil
d' Ochsn, d' Küah und dee Gäul
abputzn 's hintri Teil –
da riachst nach Mist, ja Mist,
weilst a Bauernbua bist!
Oh, wann ih nur a Maurer waar!
's Maurer sei is halt gar net schwaar!
Baut ma a Haus, ja Haus,
da schaugt ma raus, ja raus –
d' Deandln bleim alli steh,
sagn: hat's der Maurer schö!
Derf ma in's Haus reigeh?
Derf ma net bleim, ja bleim,
zum Zeitvertreim?
Oh, wann ih nur a Schlosser waar!
's Schlosser sei is halt gar net schwaar!
's Schlüsserl werd gmacht, ja gmacht,
sperrt auf bei der Nacht, ja Nacht;
's Deandl schreit: Gott und Herr!
Geist, was is dei Begehr?
Lieg dih nur zu mir her –
ih schlaf so schlecht, so schlecht,
du kimmst grad recht!
Oh, wann ih nur a Schuaster waar!
's Schuaster sei is halt gar net schwaar.
's Deandl braucht Schuah, braucht Schuah,
Schuaster, greif zua, greif zua!
Hast an Fuaß in der Hand,
hast d' Wadl aa scho gspannt,
und siehgst's gelobte Land.
Und hast a Freud, a Freud,
weil's so was geit!
Oh, wann ih nur a Schreiner waar.
's Schreiner sei is halt gar net schwaar.
Da machst a Wiagn, a Wiagn,
's Kind werst schon kriagn, ja kriagn!
D' Weiberleut spanna's glei,
sagn: Schreiner, d' Wiagn is neu,
Schreiner, jetz brauchst a Wei!
Schaug dir um a Bett, ja Bett,
und um an Göd!
Oh, wann ih nur a Dokter waar!
's Dokter sei is halt gar net schwaar!
D' Weiber schrein: kimmst, ja kimmst,
daßt mir mein Wehdam nimmst!
Schaugts nur den Dokter oh,
der is a guater Moh,
der wo oan helfa koh,
der hat's studiert, studiert,
wia ma klystiert.
Oh, wann ih nur a Herr Pfarrer waar!
's Pfarrer sei is halt gar net schwaar!
's Deandl wann beicht, ja beicht,
sagt sie's oan leicht, ja leicht,
ob's blos dee Mannerleut
oder an Deifi scheut,
und ob ihr sunst ebbs feit –
da woaßt es gwiß, ja gwiß,
wia ma droh is.
Oh, wann ih nur der Deifi waar!
's Deifi sei is halt gar net schwaar!
Großmuatta, schür ei, schür ei,
d' Höll muaß warm sei, ja sei!
Heunt is wieder gar koa Ruah,
heunt kehrn s' wieder alli zua –
nur blos der Bauernbua
derf mir net rei, net rei,
muaß im Himmi sei! |
