Grad macht s' der heili Sankt Peterl auf, dee himmlisch Tür.
A drei, a vier
schiabt er eini, der Geizkragn.
Jeh, der Bruggnschuaster voh Ismaning!
Der arm Teufi, abgschlampt und lausih guatding,
der is aa dabei!
('s Gsicht voller Rausch, wia allawei).
Was braucht denn der damisch Bruggnschuaster
in Himmi neikema,
wann s' mih net aufnehma?
Bruggnschuaster, mir wern a Wörterl dischkriern –
dih wern ma wo anderst hiführn!
»Bruggnschuaster! He! Schnupfst net noh a Pris,
wo s' doh dee allerletzte is?
Gel, Schuaster, dees hättst aa net glaubt:
's Schnupfa is fei im Himmi net derlaubt!
San scharf drauf aus: ham alle Samstäg große Parad,
da werd nachgschaugt, wer dees dreckige Schneiztüachl hat.
Ham an Pfarrer voh Hoanadorf sauber derratn,
war drei Täg im Himmi bei dee ganz vordern Englssoldatn,
am viertn ham s' nach sein Schneiztüachl gschaugt
und am fünftn ham s' n in d' Höll nuntergstaubt –
ja, Bruggnschuaster, dees san gspaßige Geschichtn,
und wer gscheidt is, der tuat schoh von vorneh verzichtn
und sagt zu an andern: paß auf, Kamarad,
geh eini für mih, ih pfeif auf dee Gnad!
Und woaßt, Bruggnschuaster, dees is noh net alls!
A diam hat ma doh so a Brenna im Hals,
und hat a truckne Zung und a hoaße Leber –
aber zum Sauffa kriagst nix, dees is dees allergröber!
Oder moanst vielleicht, vorn Himmistor
fahrt aa an dee Samstäg der Bierwagn vor?
Oder moanst, du kriagst da drobn an Beutl und an Diridari,
und im Himmi giebt's an Kramerladn und a Kramermarie?
Na, Bruggnschuaster,
da konnst koan Schußtreiber kaffa und koan Kräuterschnaps net,
Bruggnschuaster, aber dees is a Gfrett!
Und paß auf, Bruggnschuaster.
woaßt, was s' im Himmi kochn?
Siehgst koa Bröckl Fleisch dee ganz Wochn!
Hat schoh oft oaner dumm und tappi umanandergschaut –
Na, hams gsagt, es giebt koa Schweiners mit Kraut!
Oder es hat oaner nach dee Leberknödl gfragt –
nana, hams gsagt.
Aber Dampfnudl mit an Zwetschgntauch?
Na, is erst recht net der Brauch!
(Und woaßt, Bruggnschuaster, tuat's koane Dampfnudl net gebn,
na pfeift doh a jeder auf's ewih Lebn!)«
So hab ih gsagt.
Der Bruggnschuaster, der arme Moh,
hat d'Augn gstellt und hat gschwitzt,
und grad leid hat er oan toh,
und d'Zung hat er rausghängt, und dee hoaß Leber hat er ghabt,
und grad nach Luft hat er gschnappt.
Und na hat er gsagt. »Paß auf, Kamarad,
geh eini für mih, ih pfeif auf dee Gnad!« |
