Am Schtiftsberg drowwe schtäiht e Haus,

Da schenkt mer gute Schoppe aus,

Von morgens frieh bis abends schpät

De Drobbe dorch de Gorgel geht;

Die schennste Leit’ aus alle Schtend’,

Die reiche sich beim Wein die Hend’

Un hocke ouhne Schtreit un Zank

Friedlich beisamm’ uff äner Bank.

Doch schlägt es än Uhr in de Nacht,

Dann werd die Wertschaft zugemacht,

Die Bollezei schneid’ ab den Dorscht,

Un Käner kriegt e Extraworscht.

Glaab’ mer ner käner die Geschicht’,

Es wär manchmol noch länger Licht,

Denn sichste werklich sou ’n Blitz

Nach än Uhr dorch ’n Laderitz,

Des is e Errlicht, Hexerei,

Schlag’ schnell e Kreiz un gäih’ verbei!!

Doch wenn de an die Hausdiehr’ kloppst

Un an de Hausdiehrschelle roppst,

- Kä’m Christemensch ich’s rate will -

Dann is es drinn ganz touteschtill,

Mer hert kä Schterbeswertche rede,

Die Diehr verschlosse und die Läde,

Blouß dorch den äne Laderitz

Da schimmert manchemol e Blitz,

Mer riwwelt’s Aag’ vor dem Gefunkel

Un wupp! Da is es widder dunkel!

Ich sag’ Eich, folgt mer nit dem Schein,

Sonst könnt’er leicht geliffert sein,

Geschpenster hocke drin beim Schoppe

Un trinke schtill ihr Geisterdrobbe.

Doch wie ich neilich gäih’ verbei,

Treff’ ich än von de Bollezei,

Da blitzt grad’ aach des Oouselicht;

Ich guck’ dem Mann fest in’s Gesicht

Un frag’n: »Sie, is des gewiß,

Deß des da drin e Errlicht is?«

Der guckt mich ganz vergeistert ou,

Drouht mit’m Finger un gäiht devou.

Oho! Aha! Denk’ ich, da guck’,

Der wääß ’was Näh’res von dem Schpuck,

Doch wenn e Errlicht gibt kä’ Ruh’,

Da drickt er scheint’s zwä Aage zu.

Die Bollezeischtund - halt Eich dran!

Gäiht blouß uns Menschekinner an,

Da hilft kä’ Schpreize un kä’ Wimmern,

Blouß Errlichter, die derfe flimmern,

Blouß Geister derfe nachts sich rege,

Wann’s ihne paßt, so lang sie möge!

Doch wie die Sach’ wor mit dem Licht,

Des is un bleibt e doll’ Geschicht’:

Geschpuckt hat’s ’mol uff alle Fäll’,

Doch kummt mer’s Errlicht beinah’ vor,

Als wenn’s e abgeschied’ne Seel’

Von ’eme Magistratsrat wor!