Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Die Mutter am Christabend.

Er schloft, er schloft! Do lit er, wie ne Grof!
Du lieben Engel, was i bitt,
Bi Lib und Lebe verwach mer nit,
Gott gunnts mi'm Chind im Schlof!

Verwach mer nit, verwach mer nit!
Di Muetter goht mit stillem Tritt,
Sie goht mit zartem Muettersinn,
Und holt e Baum im Chämmerli d'inn.

Was henki der denn dra?
Ne schöne Lebchuechema,
Ne Gitzeli, ne Mummeli
Und Blüemli wiiß und roth und gel,
Vom allerfinste Zuckermehl.

's isch gnueg, du Muetterherz!
Viel Süeß macht numme Schmerz.
Gib's sparsem, wie der liebi Gott,
Nit all' Tag helset er Zuckerbrod.

Jez Rümmechrüsliger her,
Die allerschönste, woni ha,
's isch nummen au kei Möseli dra.
Wer het sie schöner, wer?

's isch wohr, es isch e Pracht,
Was so en Oepfel lacht;
Und isch der Zuckerbeck e Ma,
Se mach er so ein, wenn er cha!
Der lieb Gott het en gmacht.

Was hani echt no meh?
Ne Fazenetli wiiß und roth,
Und das eis vo de schöne.
O Chind, vor bittre Thräne
Biwahr di Gott, biwahr di Gott!

Und was isch me do inn?
Ne Büechli, Chind, 's isch au no di.
I leg der schöni Helgeli dri,
Und schöni Gibetli sin selber drinn.

Jez chönnti, traui, goh;
Es fehlt nüt meh zum Guete –
Post tuusig, no ne Ruethe!
Do isch sie scho, do isch sie scho!

's cha si, sie freut di nit,
's cha si, sie haut der 's Vüdeli wund;
Doch witt nit anderst, sen ischs der g'sund;
's mueß nit si, wenn d' nit witt.

Und willschs nit anderst ha,
In Gottis Name seig es drum!
Doch Muetterlieb isch zart und frumm,
Sie windet rothi Bendeli dri,
Und macht e Letschli dra.

Jez wär er usstaffiert,
Und wie ne Maibaum ziert,
Und wenn bis früeih der Tag verwacht,
Het 's Wienechtchindli alles gmacht.

De nimmschs und danksch mer's nit;
Drum weisch nit, wer der's git.
Doch machts der numme ne frohe Mueth,
Und schmeckts der numme, sen ischs scho guet.

Bim Bluest, der Wächter rüeft
Scho Oelfi! Wie doch d'Zit verrinnt,
Und wie me si vertieft,
Wenn 's Herz a näumis Nahrig findt!

Jez bhütdi Gott der Her!
En anderi Cheri mehr!
Der heilig Christ ist hinecht cho,
Het Chindes Fleisch und Bluet ag'no;
Wärsch au so brav, wie er!