Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

De Mann in'n Mand.

O, Moder, kik! – wat is in'n Man'?«
Na, sühst denn ni? – en Mann!
»Wahrhaftig ja! – ick seh' em stahn,
»He hett en Kittel an.

»Wat makt he denn de hele Nacht?
»Un hett he gar keen Bett?«
Ei, süh – he snört en Büscherdracht,
Un eben dreiht he'n Wedd.

»Weer ick de Mann, so keem ick an
»Un de't in uns' Revier!« –
Ei, weest du ni? – de dare Mann,
De is ja ni vun hier.

Un meenst, he is so fri, als du?
He de' dar mal nix Gu's,
Du Muschü Blix – dar sitt he nu
Hoch babn in't Arbeidshus.

»Wat hett he denn für Böses da'n?
»Wa heet he? – weer he'n Deev?« –
Ei, Dieder heet de Mann in'n Man',
He weer en groten Sleef.

Dat Beden, dat weer ni sin Sak,
Mit't Arbei'n harr't keen Il,
Un wenn de Mensch so gar nix makt,
Denn kriggt he Langewil.

Un seet he ni bi'n Vagt in't Lock,
Weer't hele Dörp in Gru'n,
Denn dreev he 'rum an'n Beddelstock
Un sop sick dick un dun.

»Wo kreeg he awers denn dat Geld
»To jo en Leben her?« –
Du Narr, he neehm in Hus un Feld,
Wo wat to nehmen weer.

Des Sünndags inst, dar steeg he mal
Ganz tidig op'n Tritt
Un lang dat Bil vun'n Nagel dal
Un leep to Holt darmit.

Un hau de schönsten Eeken af,
Als weer't man so nix Gu's,
Un drog se fort un leep in'n Draff
Un weer all meist to Hus.

He wull noch eben öwer't Stegg,
Dar röppt't mit eenmal lud:
»Nu, Dieder, geiht't en annern Weg,
»Nu kumm man, – nu is't ut!«

Un wuppdi! is keen Dieder mehr,
Keen Dieder nargns to sehn,
Un nümmer kummt he wedder her,
Un steiht dar babn alleen.

Dar haut he nu de Eeken um
Un pußt vör Küll de Hänn
Un dreiht de Schech un Wedden 'rum,
Un't Supen hett keen Enn.

So geiht't den armen Dieder nu,
So büßt he nu sin Sünn! –
»Gott Lof un Dank, leev Moder, du,
»Dat ick keen Dieder bün!« –

So wahr di vör de bösen Dingn,
De bringt di Not un Plag; –
Wes' brav! – des Sünndags be' un sing,
Un schaff bi Warkeldag.