Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Fritz Reuter

Läuschen un Rimels

Dat Hunn´nverbott.

So in de nägentige Johren,
As de Franzosen Kihrut danzten
Un All’ns, wat Adel was un Hochgeboren,
Ut ehren Lann’n herut kuranzten,
Dunn treckte sick de wegjagt’ Raß’
So meistendeils nah Dütschland ’rinner
Un kamm tau uns mit Fru un Kinner
Un mit Bedeinter, Hans un Klas,
Bortkratzer, P’rükenmaker, Snider,
Danzmeister, Kammerdeiners un so wider,
Un födderten un kummandirten,
As wir’n sei in den irsten besten Kraug
Un makten Larm un resonnirten,
Un nicks was för ehr gaud’ genaug,
Sei drögen ehre Näs’ in Enn’n
As wenn sei wat Besonders wir’n;
Un dorbi kunn kein Fru un keine Dirn
Mit Ihren kamen ut ehrr Hänn’n.
Un wenn denn Einer mal sin Husrecht brukt,
Na, hürt! wat gaww dat för’n Spektakel!
Un ümmer heww’n sei fri herümmer slukt:
Kortüm! Dat was en ganz entsamtes Takel. –
Na, dat hett denn so lang’ nich wohrt
Dunn is en Frugensminsch von dese Ort
Tau uns ok nah Swerin henkamen
Un Mongmorangzi heit s’ mit Namen,
Un wesen wull s’ ’ne Herzogin,
Denn unner dem wull Keiner von ehr sin.
Un’t was en oll gefährlich Dirt,
So dick un fett un dorbi lütt,
Un einen wohren Fladen wir’t,
Un was so gel schir as ’ne Quitt,
Un snacken ded’ s’ in einen Athen. –
Na, ick was dormals noch bi de Soldaten
Un stunn bi’t irste Regiment,
Un ick un Herzog Friedrich Franz, –
Denn dunnmals würd hei man noch Herzog nennt, –
Wi heww’n Beid’ un gaud’ naug kennt;
Ick säd’: Herr Herzog, hei säd’: Hans. –
Na, as ick mal eins up den Posten stünn,
Wo’t nah den Sloßgorn geiht herin,
Dunn kamm de Herzog antaugahn,
Un as hei mi dor sach, dunn blew hei stahn
Un säd’ tau mi: "Gu’n Morgen, Hans.
Hir heww’n de Hunn’n woll ehren Danz,
Wo kam’n de Köters hir herin?"
"Herr Herzog, ne! dat ick nich wüßt,
So lang’, as ick hir stah. Dat müßt
Denn vör min Tid hir scheihen sin." –
"Na, dauh mi den Gefallen, Hans,
Un paß mi up den Hunnendanz
Un lat mi keine Köters ’rin;
Denn de verdammten Dire bören
Bi jede Blaum den Bein tau Höcht,
Un wenn dat ok woll wedder drögt,
So kann man den Geruch doch spören.
Sei rüken lang’ denn nich so schön;
Drüm paß mi düchtig up, min Sœhn!" –
Na, hei güng weg, un ick blew stahn.
Un durt nich lang’, wer kamm dor antaugahn?
Min gaud’ französche Herzogin,
Dei wull ok nah den Goren ’rin;
Un up den Arm, dor hadd s’ en fetten Mops,
Un güng so œwernäs’t, as ob s’
De ganze Welt künn kummandiren.
"Holt!" segg ick, "holt! Sei kann hir nich passiren."
Wo Dunner, wo versirt sei sick,
Kamm heil un deil ut Rick un Schick,
Fung an tau schell’n, un tau paliren
Un an tau handslahn un hantiren
"Mais je suis la Duchesse de Montmorency;
Monsieur le Duc me l’a permis."
Na, dunn verstunn ick’t noch nich recht:
Nu, kreg’ ick dat all ihre t’recht,
Denn ick bün nahsten as Schersant
Herinner west in’t franzsche Land –
De olle Restörp was min Leutenant;
Tau Bützow sach ’ck em niedlich wedder. –
Doch’t Frugensminsch lep ümmer up un nedder
Un ümmer red’t s’ von ’Mongmorangzi’,
Un ümmer snackt s’von ’dick Permi’.
"Ih wat!" säd’ ick, "dat S’ gel as ’ne Pomm’ranz is,
Dat seih ick woll! Sei kümmt hir nich vörbi,
Sei sülwst un ok Ehr dick Permi!"