Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Fritz Reuter

Läuschen un Rimels

´Ne Aewerraschung.

As ick noch Probenrider was –
Vertellt mi mal oll Kopmann Saß –
Dunn reis’t ick mal dörch Meckelborg
Un kamm denn ok nah Wittenborg.
Ick steg in’n irsten Gasthof af.
Kum was ick von de Wagen ’raf,
Dunn säd de Wirth: "Je, dat is doch fital!
Ick kann Sei hüt kein anner Timmer gewen,
As de lütt Stuw rechtsch an den Saal,
Un dor gew ick hüt Abend eben
En groten Hun’ratschonen=Ball:
Na, mœglich weiten Sei dat all
Un verlustir’n sick ok en beten?"
"Min Danzen," segg ick, "heww ’ck vergeten,
Un ick bün niderträchtig mäud’,
Doch wenn s’ nich alltaudull utslagen,
Denn müggt ick’t mit de Stuw woll wagen."
Un somit gungen wi denn Beid’
Ok unnen nah de Gaststuw ’rin,
Wo ick mi denn vernüchtern ded’,
Un endlich würd mi so tau Sinn,
Dat ick de Trepp herupper steg
Un in min Stuw tau Bedd mi lädd’
Un vör min Bedd de P’rück, dei ick all dormals drög.
De Hun’ratschonen wiren all tausamen;
De Saal was vull von Herrn un Damen;
De Ball, dei was in vullen Gang’n.
Ick künn tau keinen Slap gelang’n
Un ded’ in’t Bedd herümmer rang’n.
Ick wölterte un wäult mi ’rümmer,
Un wenn ick dacht, nu slöppst du in,
Denn weckte mi de Trumpet ümmer;
Denn de oll Wand, dei was man so dünn,
Un von min Lager Wand an Wand,
Dor stunn so’n Bengel von Mus’kant,
Dei blos de Trumpet niderträchtig slicht
Un denn so lud’, as güng’t tau’t jüngst Gericht.
"Ne," segg ick, "dit’s vörbi, ne, dit’s
Doch rein tau dull, dit holl de Düwel ut!"
Un spring’ ut minen Bedd herut
Un ward’gewohr, dat an de Dörenritz,
Wo’t nah den Saal herinner geiht,
Dat Licht hendörcher schinen deiht. –
De Dör, dat was ’ne Flœgeldör,
Un ’n groten Disch, dei stunn dorvör. –
"Wenn du so nah den Disch ’rup stegst
Un dörch de Ritz en beten segst,"
Segg ick tau mi in minen Sinn,
"Dat müßt doch recht plesirlich sin."
Geseggt, gedahn! Bald stah ick dor
Un œweseih den Saal fast ganz un gor
Un alltausamen, dei dor wesen,
Un wo sei dor herümmer schesen.
Ick stah un kik, wo dit sick möt regieren,
Doch endlich ward de Puckel mi doch friren,
So as ick up den Disch dor stunn,
Obschonst dat was bi Sommerdag.
Ick steg nu von den Disch herun
Un treck den swarten Kledrock an,
Den’n ick des Sommers ümmer drag’,
Un dormit steg ick denn up’t Frisch
Herupper wedder up den Disch.
Ick stah un stah, un stah de Bein
Mi denn binah in’t Lif herin.
"Ih," segg ick, "wat en Nar ick bün!
Wenn ick hir länger will wat seihn,
Denn kann ’ck mi dat bequemer maken."
Un as ick dat tau mi heww spraken,
Dunn lang’ ick mi en Staul herup
Un sett mi dor denn baben up.
Hir sitt ick denn nu wunderschön!
Doch üm bequemer noch tau rauhn.
Weit ick nicks Beteres tau dauhn,
As dat ick an de Dör mi lehn.
Dor satt denn woll kein Riegel vör,
Un’t olle Slott müggt ok nich recht mihr hacken:
Mit einmal fängt dat an tau knacken,
Sparangelwid flüggt up de Dör,
Un ick, so wohr ick ihrlich bün,
Fall in ’ne Kegelkadrilg’ herin.
Nu fang’n s’ denn all gefährlich an tau schrigen
Un de Musik swiggt bomenstill;
Un as ick sacht mi wedder drücken will.
Dunn ward mi Einer bi’t Slafitken krigen. –
"Swinegel," säd’ ’e, "schämst Di nich?
So in den Saal herin tau kamen,
In so en Uptog vör de Damen?"
"Herr Gott!" dacht ick in’n irsten Ogenblick,
"Herr Gott, hei meint gewiß din P’rück,"
Un fat nu œwer’n Kopp de Hänn’n tausamen;
Doch as ick unnen mi besach,
Dunn denk ick doch, ick krig’ den Slag!
Ick dukt mi also fixing dal
Un set’t mi in de Huk nu in den Saal;
Herr Je, wat gaww’t nu för en Larm,
Un ick satt dor, dat Gott erbarm!
Doch endlich ded’ ’ck en Hart mi faten,
Ick also up! un kort entslaten,
Wull ick nah mine Stuw herin,
Doch de oll Disch in’n Weg mi stünn.
Na, baben œwer künn ’ck nich kamen,
Ick dreiht mi also nah de Damen üm,
Makt ehr en deipen Diner vör:
"Verzeihn Sie," säd’ ick, "meine Damen,"
Un kröp nu zirlich unnen dör.