Projekt Gutenberg-DE
Autoren ∞ Werke ∞ Neu ∞ Information ∞ Shop ∞ Lesetips ∞ Textquelle ∞

Flinserln
Inhalt

Inhalt

Autorenseite
 << zurück weiter >> 

Anzeige. Gutenberg Edition 16. 2. vermehrte und verbesserte Auflage. Alle Werke aus dem Projekt Gutenberg-DE. Mit zusätzlichen E-Books. Eine einmalige Bibliothek. +++ Information und Bestellung in unserem Shop +++

Auf dá Küahwád.

 
89.
            Blas' nur zua,
Haltábua!
's lost nit blos Kalm und Kuah;
Schau nur, dös Derndál durt
Will gar nit furt.
 
90.
Was stehst denn, Derndál? – Kumm nur
Ih bin koan faulá Bua:
Zu'm Blasen und zu'm Busseln
Hab' ih noh Ath'n g'nua!
 
91.
Heunt küss' ih mein Derndál,
Heunt' bin ih noh da,
Heunt' springá noh d' Lamperln'
Und morg'n sticht má s' a.
 
92.
Wo's Küah' gibt, sán Schwámmerln,
Wo's Gras gibt, sán Küah',
Und wo's Buam gibt, sán Derndáln,
Und wo's Derndáln gibt, – mir!
 
93.
Dáß d' Kuahrl'n disk'rirn toan,
Dös is gár koan' Frag': –
Dös durt sagt zu'm Beispiel,
Dáß 's ás Gras nimmá mag.
Dös drob'n sagt: Steigt's auffá,
Da labt má sih's G'müat;
Dö drunt' sag'n: Mir dank'n,
Ietzt sán má schon z' müad.
Dö oani sagt: Trink'n má,
Und stellt sie zu'm Bach;
Dö andán vástengán s',
Und treppeln ihr nach.
Dö oani sagt: Fress'n má;
Dö andán sag'n: Schön!
Und lass'n koan Stámmerl
Bei'm Erdboden steh'n.
Dá Jodl mi'm Godá,
Steht, ohni si z' rühr'n,
Und denkt si: Mir müaßt's ös
Do alli párirn!
 
94.
Wie mih dös Kuahrl da
Anschaut so stád
Akk'rát so, als wánn's
Auf was nachdenká tát'.

Ja, wánn dös Kuahrl denká kinnt',
Dös denkát sih schon g'wiß:
Der Bua wár' anderst lieber wo,
Als da, wo-r-á g'rad is.
 
95.
Was 's Viech für á Leb'n hat!
Es denkt an koan'n Morg'n,
Es därf sih um's Ess'n
Und 's Trink'n nit sorg'n.

Wann's wild is, därf's z'Haus bleib'n,
Wanns schön is, geht's aus;
Z' Mittag, da geht's wieder
Auf á Haurástl z'Haus.

Und für all's dös – wie billi?
Bezáhlt's halb und halb
Á paar Emá Milli,
Und imm'r-á-mal á Kalb!
 
96.
        Dö Kuah' mit-r-án'm Schnürleib,
Mit-r-án'm Strohhut au'm Kopf,
Mit-r-án'm seidánán Kittel
Und án'm Kraus umá'n Kropf,
Dö schauát' akk'rát
Wie d' Váwalterin aus,
Wann s' g'státzt, wie-r-án Essigkrug,
Dáláhnt vor'm Haus.
 
97.
        Schnalz'n má und blas'n má und dudeln má was,
Trink'n má-r-á Máss'l, – ih zahl's!
Was ih vátrink' und váschnalz' und váblas',
Wünsch ih mein'm Feind nit an'm Hals!
 
98.
      D' Lieb' soll ih aufgeb'n?
Laßt 's má-r-án'n Fried'!
Wann dö Kuah 's Gras nit kennt,
Frißt s' ás áh nit.
 
99.
Es rauscht was, es kummt was
Vástohl'n auf mih zua:
Hab' g'moant, 's is mein Derndál,
Dáweil war's á Kuah!
 
100.
Bim, bim und bám, bám,
Dö Kuahrln zieg'n hám;
Nit zwoa gengán z'gleich,
Tritt á-n-iard's sih sein'n Steig.

So sán d' Menschen akk'rát
Gengán áh á so z' strát;
Kemán gleihwölst áwal
Wiedá z'samm in oan'm Stall.
 << zurück weiter >> 
Impressum ∞ Nach oben ∞ Datenschutz