Schau, schau, liebi Bleameln,
Da find' ih eng ja!
Sobald als 's nur ápern tut,
Seid's áh schon da.

Da-r Erd'n fangt 's Herzerl
Schon z' tokaz'n an,
Und d'Frau Sunn' tut' ihr Möglig's,
Und bleankázt, was s' kann.

's is allás schon g'recht'lt,
Má wárt'n schon drauf;
Nur d' Schlüsserln hab'n g'fehlt noh, –
Ietzt lüfti! Spiart's auf!

Spiart's auf, liebi Schlüsserln,
Das himmlischi Toar:
Dá-r Auswärts will fürá,
Nur 's G'wölk steht noh voar.

Schiebt's d' Nebeln vánandá!
In's Schlüsselloch 'nein! –
Áh – aufg'spiart is, aufg'spiart,
Was sollt's denn sunst sein? –

Ietzt is á heraust'n!
Da-r Auswärts is da,
Und wann má'n nit sechát',
Má riechát'n ja!

Fur's Aufspiarn, ös Schlüsserln,
Schön'n »Gelt'sgod« von all'n:
Auf's Jahr um dö Zeit
Tut's uns wieder den G'fall'n!