Sunst, wann mih wo d' Mádeln von weit'n hab'n g'spürt,
Gleih war'n s' bei da Heck' mit-r-ánand,
Und hab'n erná G'stánz g'habt und hab'n mi vexirt,
Mih z' busseln war koaná-r á Schand';
Ietzt lass'n s' mih steh'n, wie-r á Wáserl im Eck',
Ih kann ma nit vorstell'n, mit was ih s' váschreck',
Ja, wann ih so nachdenk'n tu-r übá mih, –
Ih find' sunst koan' Ursach', als d' Meláncholie!

Sunst war má mein Wirtshäus'l 's liebsti von all'n,
Da war ih in mein'm Element,
Da hab' ih, mein'n kreuzfidel'n Spitzbrüderln z' G'fall'n,
Gar oft 's letzti Fünferl váwend't;
Ietzt schmeckt má koan Elfá, so rár als er is,
Ietzt krieg' ih schon von-r á par Máß'ln án'n Riß,
Dö Schwäch'n, dö is wie herg'flog'n übá mih: –
Und ih wüsst' koan'n Grund, als mein' Meláncholie!

Sunst war ih bei'm Streit'n und Politisir'n
Á Mann bei dá Spritzen, wie 's háßt;
'm Teuxel á-n-Ohrwáschel az'dispátir'n,
Dös hätt' ih um's Leb'n nit vápásst;
Ietzt red'n s' an-r án-m Tisch oft so öd und so g'schwoll'n,
Ih laß s' diskurir'n und laß s' plauschen, wie s' woll'n; –
Á Dummheit macht ietzt gar koan'n Eindruck auf mih, –
Ja dös kummt halt all's von dá Meláncholie!

Sunst war ih auf 's Karteng'spiel recht pássionirt,
Von Klopfen á Freund und Laudir'n;
Hab' g'setzt was ih g'habt hab', und zugeb'n und g'schmiert –
Bei'n Madeln und bei'm Tárokir'n!
Ietzt g'freut 's mih nit mehr, weil ih allweil válier',
Ietzt spielt halt 's Málör Máriásch'n mit mir;
Dö Schwarzi is allweil Átutt ietzt für mih, –
Dös allás kummt rein von dá Meláncholie!

Und was bei dá G'schicht noh am meisten mih gift't,
Dös is, dás ih fett dábei wir';
Drum glaubt m'ás áh nermst nit, was allás mih trifft,
Und alli Leut wer'n völli irr.
Wohin ih nur kumm', wir' ih g'frotzelt und g'hunzt.
Und allás tut übá mih lachen, wie sunst; –
Ja – lach'n?! – Ih lachát' oft áh übá mih, –
Es tut's abá nit – weg'n dá Meláncholie!