Und nit bloß auf dös,
Was 's eppá draußt an'm Herd,
In's Grüb'l, in Gedanká-r habt's
Mi'm Asch'n eini kehrt;
Auf dös áh, Derndáln, gebt's fein acht,
Was ganz vástohl'n und g'hám
In eng'ri Herzen glost und glimmt,
Und aufpluscht wie-r im Trám;
Macht's ja koan'n G'spaß dámit, schaut's nach,
Ehwenn's recht zundt'n hat:
Wann's schon bei'n Augnán auffáleucht't,
Aft is's zum Lösch'n z'spat.
D' Freiheit vásengt sih d' Flügerln bald,
D' Ruah' fangt als wie-r-á Stroh;
Dá-r Uebámut dástickt vur Hitz,
Dá Kopf brinnt lichtáloh.
Ih schierf' eng's ein: – g'schiecht denná was,
Seid's ös, auf dö ih's schieb'!
Auf's Feuer, was ih moan', geht's acht:
Dös Feuer – dös is – d' Lieb'!

Ös Bub'n und Derndáln, laßt's eng sag'n:
Dá Hammá der hat Elfi g'schlag'n!
Gebt's acht auf 's Feuer und auf 's Liecht,
Dáß Nermbst koan Schaden g'schiecht.
Auf 's Liecht!

                    Und nit auf dös álloan,
Was 's untá'm Auszieg'n drob'n,
Vur Napfáz'n, habt's eppa z'nach'
Zum Polsta zuwig'schob'n;
Auf dös áh, Derndáln, páßt's má-r auf,
Was, so vástohl'n und still,
Aus tausend Sterndáln abáblitzt,
Wann má just fensterln will,
Dá Mondschein hat á Spitzbub'nlicht,
Wann 's bleankázt drob'n und glimmt;
Má moant, d' Váliebt'n hätt'n sih's
Zu'm Spearnzeln extrá g'friemt.
Páßt's auf: in derá Liecht'n denkt
Má goar z'gern auf koan'n Tag,
Und dáß oft, was dá Mond vátuscht,
D' Frau Sunn' nit tuschen mag.
Drum, Derndáln, macht's fein d' Fensterln zu,
Und gebt's auf 's Liecht gut acht:
Wer schlaft, is frumm, und frumm is schön, –
Ietzt, Leut'ln, guti Nacht!