Fruhmorg'ns, noh ehwenn sih á Miliwei rührt,
Wann draust auf dá Schmelz 's Militär manövrirt,
Da sán schon Leut' g'nua,
Und schau'n andächti zua;
Án'n g'werbsámen Menschen treibt 's G'scháft aus'm Haus,
Sunst ranzt á sih lieber im Bett noh gern aus; –
Aber dös sán halt glücklichi Leut',
Dö hab'n alláweil Zeit, dö hab'n alláweil Zeit.

Um neuni, wann áná just steht auf dá Bühn',
Da poseln s' und rennen s', wie d' Winigen, hin,
Und gengán nit fort,
Sán um zwölfi noh dort,
Und erzähl'n sih zehntausendmal, was er hat toán,
Und schau'n blos den Fleck wo á g'stand'n is, an, –
Ja, dös sán halt glücklichi Leut',
Dö hab'n alláweil Zeit, dö hab'n alláweil Zeit!

Z'Mittag wann dö Wach' aufziegt; auf dá Bastei,
Au'm Grab'n, in der Jägerzeil, bis um á drei,
Má wáß nit: woher?
Dö Leut' wer'n immá mehr!
Má mánát', dá Hungá vásprengát s' nach Haus,
Sö hätt'n was z' tun, odá rastát'n aus, –
Abá 's gibt schon so glücklichi Leut',
Dö hab'n alláweil Zeit, dö hab'n alláweil Zeit.

In alli Káffeehäuser is dös á G'schwur,
Und doh, wann á Leich' wo wird, gibt 's noh Leut' g'nua;
Wann Hochzeit wo is,
Noh, – da laufen s' schon g'wiß;
Sogar auf'm Schánzel, wo d' Hund' apportir'n,
Wár 's nöti, für'n Platz sih zu pränumerir'n; –
Ja – dös sán halt glücklichi Leut',
Dö hab'n alláweil Zeit, dö hab'n alláweil Zeit!

Auf d' Nacht im Theater, im Wirtshaus, au'm Saal,
Und wo nur á Geig'n sih rührt, Leut' überall!
Wann s' anschlag'n um án's,
Braucht má Tausend: – da sán s';
Und fallt noh um zwá wo á Schlafhaub'n herab,
So gengán dort d' Leut' noh um drei auf und ab; –
Ja – dös sán halt glücklichi Leut',
Dö hab'n alláweil Zeit, dö hab'n alláweil Zeit!

Doch wann má was g'schwind will von'n Handwerkern krieg'n;
Wann 's ernsteri Ding' gilt, als bloßes Vágnüg'n;
Wann áná soll zahl'n:
Wann má bitt't um án'n G'fall'n;
Und erst wann má wo bei án'm gnädingá Herrn
Im Vorzimmá pásst und möcht' vorg'lass'n wer'n, –
Ja – da gibt 's wieder andári Leut',
Dö hab'n niemals á Zeit, dö hab'n niemals á Zeit!