Autoren

∞

Werke

∞

Neu

∞

Information

∞

Shop

∞

Lesetips

∞

Textquelle

∞

Flinserln

IV. Kloani Kumödi-G'spiel.'

1. 's Váhör.

(Red'n toán mit ánandá: Dá-r Amtmann, dá Matthies Grámpler und sein Göd, als Zeug'.)

Dár Amtmann (zu'm Matthies).
Seid's ös dá Matthies Grámpler?

Dá Matthies.                                     Ja, – ih bin 's!

Dá Zeug'. Ja, ja, g'streng' Herr, – er is 's.

Dár Amtmann (schiefri zu'm Zeug'n).         Halt't 's engá Mál!
(Zu'm Matthies.) Ös habt's 'n Seppel Schmalz váwichá klagt?! –

Dá Matthies. 'n Seppel Schmalz, g'streng' Herr!

Dá Zeug'.                                                       'n Seppel Schmalz –

Dár Amtmann. Kloanhäusler? –

Dá Matthies.                             Ja – Kloanhäusler –

Dá Zeug'.                                                               Ja – g'streng' Herr,
Á kloáni Hütt'n hat-r á –

Dár Amtmann.                     Num'ro zwoanz'g –

Dá Matthies. Ja – Num'ro zwoanz'gi –

Dár Amtmann.                                   Drent', in Sairing –

Dá Zeug'.                                                                       Ja –
In Sairing drent', bei'm Haltábach. –

Dá Matthies (zu'm Göd'n).
Nán, nit bei'm Haltábach, Herr Göd –

Dá Zeug'.                                               Dös háßt,
Wann dá g'streng' Herr sih árschlings umidráht,
Aft kimmt á zun án'm Brück'l –

Dár Amtmann (schnarcht 'n Zeug'n an). Plauscht 's nit drein!

Dá Matthies. Ja, – ja, g'streng' Herr, dá Göd hat recht' Ih hab'n
Von alli Sachá hoarkloan infámirt,
Und weil sein Málwerch besser is, als mein's,
So ha' ih 'n mitbracht, dáß á fur mih red't!
Er is á g'scheitá Mann, – is bei dá Landwiáhr –
Was is da Göd schon bei dá Landwiáhr g'west? –

Dá Zeug'. Ja, – ja, g'streng' Herr, á G'moaná bin ih g'west,
Und hätt' má d'selb'n 'n Krieg nit schleuni' g'end't,
Ih moan', ih hätt 's noh weitá bracht –

Dár Amtmann (springgiftig).                       Kreuz nein!
Ietzt gebt 's anmal án'n Fried'! Ob 's ös
Dá Prinz Paphnuzi selbá seid's,
Da kráht koan Hahn dánach! – D'Sach' dráht sih nur
Um dös: zweg'n we dá Matthies Grámpler da
'n Seppel Schmalz, Kloanhäusler drent' von Sairing,
Váwichá bei dá Herrschaft klagt hat!

Dá Matthies.                                         Ja –
Klagt ha' ih 'n –

Dá Zeug'.                 Ja – ih bin dá Zeug', g'streng' Herr!

Dá Matthies. Und derntweg'n hätt' má halt, g'streng' Herr, á gar
Á schön's Gebitt: – dáß dá g'streng' Herr uns möcht'
Behilfli sein zu unsám Recht –

Dá Zeug'.                                     Mein God!
Was hätt' denn unseroan's, wann má sih nachá
Noh gar sein biss'l Recht nit sichern kinnt'.
Und weil má halt vom g'streng' Herrn gar á so
Viel Löblich's g'hört hab'n, dáß á nit so is,
Wie d' andán Schnipsá, dö mit ernri Händ'
In unsri Sáck' drinnsteck'n, als wann 's so
Schon justáment sein müsst', so sán má halt
Zu'm g'strengá Herr hergangá-r, um dá Hack'n
Án n Stiel da z' finden; – laßt má so á Sach'
Z' lang ang'steh'n, – mein – dös wáß wohl dá g'streng' Herr
Aus ágná Práxi – so is 's schon mi'm Recht
Mátthä am letzten. –

Dá Matthies.                   Ja – dös moan' ih áh! –

Dár Amtmann (in áná Furi).
Ih abá moan', dös braucht á Viechgeduld,
Bis oaná-r aus zwoa solchi Learnl'n, wie's
Ös, meint lieb'n Manná, seid's, á kloan's
Vánünftig's Wirt'l aussáfrátscheln kann.
Was wollt's denn hab'n? Dá Matthies Grámpler hát
'n Seppel Schmalz váklagt, – dös steht da schwarz
Auf weiß. –

Dá Matthies.     Ja – ja, g'streng' Herr, dös ha' ih –

Dá Zeug'.                                                             Ja –
Mein Oach'l! Ih bin Zeug'! –

Dár Amtmann.                           Zweg'n we denn abá'? –
Entwedá habt's ös alli zwoa án'n Sábel,
Und dös oan'n, der sih g'wasch'n hat, – wo nit,
So seid's ös á par feini, g'schmierti Vögeln,
Dö mih bárduseln, mih auslins'n woll'n,
Ob 's mih, auf's gáchi Glück, váleih zu engán
Speránzel mach'n kinnt's! – Denn gar so bládi,
Dölearnkáti zwoa Talápatsch'n wár'n má doh
Noh nit vurkumá! Marsch! – Váhaut 's eng ietzt!
Dá Scherg hat noh á Haselnußsalb'n, – marsch!
Ehwenn 's was klag'n wollt's, denck 's eng 's imm'rámal
Erst z'samm, – und macht 's án'm grad'n Mann koan' Gall'.

Dá Matthies. Mir buss'n d' Hand, g'streng' Herr!

Dá Zeug'.                                                           Mir buss'n d' Hand.

Dár Amtmann. Ietzt kummt dá Mark, – da káfft's eng án'n Vástand!

(D' Bauán kratz'n a.)