|
||||||||||||||
| Autoren | ∞ | Werke | ∞ | Neu | ∞ | Information | ∞ | Shop | ∞ | Lesetips | ∞ | Textquelle | ∞ | |
|
|
||||||||||||||
| Autoren | ∞ | Werke | ∞ | Neu | ∞ | Information | ∞ | Shop | ∞ | Lesetips | ∞ | Textquelle | ∞ | |
Anzeige. Gutenberg Edition 16. 2. vermehrte und verbesserte Auflage. Alle Werke aus dem Projekt Gutenberg-DE. Mit zusätzlichen E-Books. Eine einmalige Bibliothek. +++ Information und Bestellung in unserem Shop +++
| Es hot der Deubl 'n Vetter g'hat, Der war e' Verehrer vum Geld Un' war e' Zaubermeeschter drbei, Wie je eener war uf der Welt. For's Geld do hot er Alles getha' Un' Alles hot er gekönnt, Un' vun denne' Künschte' hot emol g'hört E' lidderlicher Student. Un' seller Student war juscht marod Un' hot vor Lumperei 'N schreckliche' Katzejammer gehat Un' gar ke' Geld drbei. Jetz' hot er dann stark philosophirt Un' hot sich erbärmlich beschwert, Daß so viel Uebl sey uf der Welt, Es sey doch unerhört. Un' wie er so denkt, so fallt 'm ei', Ja hättscht de nor Geld wie Heu, Do wärscht de jo leicht alle Uebl los, Der Zauberer helfet glei'; Aber Geld, ja Geld, nix is umesunscht, Der Mann is druf wie verpicht, Bezahle' muß mer e' jedi Kunscht, Deß is e' bekannti G'schicht. Ei sächt er, wie wär's, probir's emol Un' verschreib 'm Deubl dei' Seel, Do hoscht, was de' willscht, an Geld un Gut Un' lebscht dei' Lebe' fideel. Dann wie's mit de' höllische' Quaale' is, Deß weeß mer jo doch nit recht, Es werd nit so gar gefährlich sey', Wann eener sei' Seel' versprecht. Do ruft er 'm Deubl, – der hört gar gut, Un' eh' er sich's versicht, Do war er, un' hockt uf 'm Kanapee, Wo deß Studentl liegt. »Die Gränk', Herr Deubl, freß Er mich nit!« »»Bewahre', was fallt Ihne' ei', Sie hab' gewünscht, drum bin ich do, Zu Ihre' Dienschte' zu sey'.«« Ei, is er so artig, denkt der Student, So geht die Gschicht nit krumm Un' handelt und jüddlt halt hi' un' her, Dann alle zwee ware' nit dumm. Un' macht mit 'm aus for sei' armi Seel', Daß, lebt er wie er will, Sei' Lebtach ihm ke' Geld ausgeht Un' bräucht er aach noch so viel. Der Deubl denkt, du treibschst nit lang Un' bleckt gar freundlich die Zäh', »»Es gilt, Herr Student, die Kass' is gefüllt, Gute Beßrung, befehl' mich gar schö'.«« Jetz, sächt der Student, jetz soll uf der Welt For mich ke' Uebl mehr sey', Un' lad't sich gar gschwind zum Concilium Den mächtige' Zauberer ei'. »Was zahl' ich, wann Er, aber gschwind wie der Wind, Mei' Katzejammer corirt?« »Ei hunnert Louisd'or, mei' gnädiger Herr, Do hab' ich nit viel profetirt;«« Als druff! do hot Er die hunnert Louisd'or, Un' mit eme Troppe' Tinktur War Katzejammer un' Alles vorbei Un' meeschterlich war die Cur. Jetz' lebt der Student in Saus un' Braus Un' wo 'n e' Uebl genirt, Do hot als der Magier gschwind wie der Wind For blanke' Dukate' corirt. Kenn' Schnuppe', ja nit 'n Stich vum e' Floh, Nix hot er vertrage' der Jung', Ich will ke' Uebl, so hot er als gsagt, Nor Freed un' Beluschtigung. Un' Geld hot's gekoscht, mer glaabts gar nit, Dann Uebl sin' kumme' die Meng' Un' der Hexe'meeschter vor lauter Gethu' War oft im gröschte' Gedräng. 'S war luschtich! – doch mitte' im Jubl sich', Do kummt der Deubl drher Un' wettert un' flucht': jetz hab' ich's genug, Jetz' zahl' ich kenn' Kreuzer mehr. Bei so eme Handl' do gieng' ich zu Grund, Wer lebt ohne Plooch uf der Welt! Un' Sie, um befreyt vum e' Schnuppe zu sey' Verputze' mer Kischte voll Geld! Ich will Ihne' sage', so thu' mer nit, Behalte' Sie hübsch' Ihr' Seel' Un' ich b'halt mei' Geld, sunscht lacht mer mich aus, Wann ich vun dem Handl verzähl'. – Un' Rum bidi bum, in Feuer un' Blitz, Uf eemol war er ewech Un' unser Student war wiedder wie sunscht In Katzejammer un' Pech. |
|
| ——— | |
| Do kann mehr wohl sehe', wie uff der Welt Doch Uebl un' Elend so groß, Wann selber 'm Deubl die Kaß' nit langt Un' er kaaft sich nit een' drvun los! |
|