Erinnerscht dich noch selle Hütcher
Vun Roth un' Grün mit geele Band,
Mit denne himmlblaue Franse',
Ach Gott, was ware' die scharmant!

Un' wie uns nocher die Franzose'
Die lange' Colliers mitgebracht,
Ich glaab' sie ware' vun Coralle',
Was ware' die so schee' gemacht.

Un weescht de noch beim Zuckerbäcker
Die Herze' mit dem rothe' Eis,
Do habe' mer gar oft eens gstohle',
Un' 's habe's als gethan die Mäus'.

Un' weescht de noch die groß' Beleuchdung,
Den Weltspektakl in der Stadt,
Du hoscht getrage' e' Salöppche'
Un' ich e' sammteni Cravatt'.

Un' weescht de noch mei' scheckich Hundl
Un' unser marmorirti Katz,
Die habe' als minnaner g'fresse'
Un' sie war sei' erklärter Schatz.

Ja ja die Jugend is halt herrlich
Mit all'm Scheene' reich beschenkt,
Un' is mer aach e' alti Schachtl,
Sie freut emm, wann mer nor dra' denkt.