Ich aber weeß drei große Herrn,
Die selbigs Buch nit nennt,
Un' die mer länger uf der Welt,
Als all' die annre kennt.

Der Himml sich! is so e' Herr,
Was tragt der viele Stern,
Un' was for Stern, 's hot's kenner so
Vun annre große Herrn.

Do is ke' Pappedeckl dra',
Uf den der Glanz is g'stickt,
Do hot ke' krummi Näherinn
Dra' 'rumgemacht un' g'flickt.

Un zeigt er erscht deß große Band
In aller Farbe'pracht,
Do merkt mer's, der is vun Natur
Zum große Herrn gemacht.

Der zweete, dem ich nenne' will,
Un' dem aach kenner gleich,
Deß is der Frühling, liebe Leut,
Wie vornehm un' wie reich!

Sei' Hofstaat is wie Morge'roth,
E' Paradies sei' Land,
Sei Page' sin die junge' Bääm
Mit Sträußcher in der Hand.

Deß allerschönste Wappe'feld,
Der schönste Schild g'hört sei',
Es blühe' alle Blume' drinn,
Un 's is vun Sunne'schei'.

Un Alles hot er, was sich schickt
For edle große Herrn,
Er is jo Freund der Poesie
Un' hot die Dichter gern.

Der dritte, ei deß is der Wein,
Der war emol e' Gott,
Do is ke' Zweifl, daß er aach
Vun große Herrn 'was hot.

Denkt nor, wann der kummt zum e' Fescht,
Wie macht er's froh un' schö',
Do sunnt sich Alles in sein'm Glanz
Un' will nit vun 'm geh'.

Un' den er freundlich hot gegrüßt
Der denkt mit Freede' dra'
Un' sicht er 'n wiedder, guckt er 'n aach
Gar ehrerbietig a'.

Ja ja, deß sin drei Cavalier',
Die d'rum nit kleener wer'n,
Un' zählt se aach desselbe Buch
Nit zu de' große Herrn.