O Blümche' hab' ich mer gedenkt,
O wie beneid' ich dich,
Du blühscht so hübsch un' ruhig do,
Wie anners find' ich mich.

Dir will mer nix, dich quält mer nit;
Du guckscht de' Himml a'
Un' zählscht in deinem stille' Glück
Die Silberwölkcher dra'.

Un wie ich deß so denk', so kummt
E' Papilion drher,
Der thut, als wann deß zarte Ding
For ihn gewachse' wär'.

Er schnuflt dra' un' grablt dra'
Voll Hunger un' voll Gier
Un' wühlt die Blätter schier caput
Deß übermüth'ge Thier.

Un' wie er wech is, kummt e' Bien'
Mit wüschte geele Füß',
Die hockt mit Summse' d'ruf un' freßt
Un' freßt de' Honig süß.

Un' nocher kummt e' Käffer her,
Der war so schwer un' dumm
Un' druckt un' biegt deß Blümche' do
Bis uf de' Boddm um.

Un' drüber fangt's zu dunnre' a'
Un' endlich haglt's gar
Uf mich un' Blum un' Büsch un' Bääm,
Daß's zum d' erbarme' war.

Die Gränk', so kann dann gar nix sey'
In Ruh' un' ohne Plooch,
Warum jetz' deß nit anners is,
Denk' lang schon drüber nōch.