Un' wie se dann aach ihr Lob verdiene',
Un' was eens sey' un' gelte' muß,
Um oft e' lahmi Seel' zu erhebe',
Un' was mer do braucht an Spiritus.

Sich! sächt so e' Ding, 's is noch ke' zwee Woche',
So hab' ich e' Lieb im e' Herz angezündt
Un' hab's in e' Luscht un' e' Glück ei'gewicklt,
Der Jung' war vor lauter Verzucke' wie blind.

Un' ich, sächt e' anners, ich derf's wohl aach sage',
Es war e' armer kränklicher Mann,
Den hab' ich getröscht, ich glaab der Herr Parrer,
Daß der so erquicklich kenn' tröschte' kann.

Un' ich hab' aus ganz gemeene' Soldate',
Weeß Gott, die gröschte' Helde' gemacht,
Die ware', wie die lebendige' Deubl,
'Hab' selber gemeent, ich bin in der Schlacht.

Un' ich hab' 'n Musikmeschter begeischtert,
Der hot euch gebeschtlt e' Symphonie,
Mit Trumml un' Peife', gar luschdich zu höre',
Deß Alles macht unser Wei' un' Genie.

Do sächt ganz still zum e' ernschthafte Krug
E' Römer: ei Dunner die protze' genug.
»Mei', geh' mer ewech, die Windbeutl do,
Sächt der, deß Verdienscht is all' nit e so,
»'S hot vun denne' Troppe' ke' eenzicher 'was,
»Die Gschicht is im Keller e' altes Faß,
»Deß steht halb vergesse', bescheide' un' still,
»Un' wann halt so e' Kammrad was will,
»So gebt's 'm halt was, un' weil's hübsch groß
»So zappt halt e' jeder tüchtich d'ruf los,
»Wann aber im Keller deß Faß nit wär',
»So wäre se All' gar erbärmlich leer.«

Sich! so prahle' viel' mi'me große Genie,
Mit hohe' Gedanke' un' Poesie,
Un' mache' do drüber e' langi Brüh',
Aber 's Faß im Keller nenne' se nie.