»Ei was e' schee' Kindche, sächt er zu ihr,
Wie frisch die Aagelinn sin,
Und die Bäckcher grad wie die Rose' so roth
Un niedliche Grübcher drinn.

»Du bischt gewiß brav du goldich Ding,
Mer kann jo nit artiger sey',
Ich gäb' viel Geld drum, hätt' ich dich
Un wärscht du Engelche' mei'.«

Un wie er so red't, so hot er nor als
Nit 's Kind, sondern 's Mädche' betracht't,
Die hot sich d'rbei ihrn Theel gedenkt
Un bot ganz heemlich gelacht.

»»Ei, sächt se zum Kind, sach': Lieber Herr,
Wann Sie e' so freundlich sin',
So kaafe' Se mer aach e' neui Haub',
Damit ich noch hübscher bin.««

Do krablt der Alte gar gschwind im Sack
Un holt e' Paar Thaler 'raus
Und gebt se der Magd voller Zärtlichkeit,
Als wär's e' Blume'strauß.

Die nemmt se un sächt zu dem Kleene: »»So!
Jetz' geb' aach e' Händche' dem Herrn,
Dann jetziger Zeit is's e' Selte'heit,
Hot eener die Kinner so gern.««

Do fahrt 'm deß Kind mit der Hand in's Gsicht,
Un sie sächt: 'fell' mich gar schee,
Un geht wieder fort un der Alte guckt
Un guckt und bleibt als noch steh'.

Do hat er zwee Sache' gesehe' noch,
'S Kind hot 'm mi'm Aermche' gewinkt,
Un drei junge' Soldate', die habe' die Magd
Mit Kichre' un Scherze' umringt.

Ich weeß nit, deß ee', wie deß anner' war
Juscht nit sei' bsunnerer Spaß,
Dann er hot nit gewinkt dem freundliche' Kind
Un gebrummlt hot er so 'was.