Als kleener Bu' war 's Werthshaus schun
Mei' liebschter Aufenthalt
Un' wann ich een' beschumle' kann,
No'! so beschuml' ich halt.

Un' Händl habe' un' Krawall
Deß geht mer All'm vor,
Drum wann mich eener heest 'n Lump,
Recht hot er, es is wohr.

Jetz' aber kummt e' annri Froch,
Die hab' ich mer oft g'stellt,
Wann's gar ke' Männer gäb' wie ich,
Wie wär's dann uff der Welt?!

Wann die Moral e' Uneform
For alle Mensche' wär',
Wo käm' dann e' Begeischterung
For Tugendhelde' her?

Die wäre' ganz zu Grund' gericht'
Mit all' dem Eenerlei,
Un' Strebe', Ringe', Nocheifrung,
Deß Alles wär' vorbei.

E' Kerchethorn zeigt a' die Kerch,
Un so 'was kann er bloß
Sich! weil die Häuser kleener sin,
Mit dem nor is er groß,

Un' wo Licht is muß Schatte' sey'
Un' 's is gewiß ke' Lug',
Der wo dem Schatte' weiht sei' Kraft
Hot dra' zu thu' genug.

Drum will ich bleibe' aach e' Lump,
Bis ich im Loch drinn liech',
Dann 's gschicht der Tugend nor zur Ehr'
Un' for die opfr' ich mich.