Der Bachus hot gsacht, ihr liebe Kinner,
Den Gfalle' den will ich euch wohl thu',
Es schick' nor e' jeder e' kleen's Deputat,
Nocher halt' ich e' Prüfung im große' Rath.

Deß ware' die Wein' natürlich zufriede'
Un' Gsandte sin' kumme' vun aller Welt
Un' 's hot nor gewimmlt vun Glanz un' vun Pracht,
Dann der kleenschte der hot sein' Staat gemacht.

Un' 'm Bachus sei' Cermoniemeeschter
Der hot ihne' gsacht, wann die Prüfung is,
Geht jeder, so wie 'm gewunke' werd sey'
Beim König ganz still in die Gorgl 'enei'.

Un' richtich! so wie der Dag is gewese',
So bot der Bachus der Reih' noch gewinkt,
Deß erschte, deß ware' die Herrn vum Rhei',
Die sin' dann stolzirt wie die Ferschte' 'enei'.

Dernocher sin' glei' die Burgunder 'kumme'
Un' die Bordeaux mit ihr'm rothe' Talar, –
Do habe die Grieche' schun Gsichter gemacht
Un' habe' die Fremde gar scheel betracht't,

Un e' alter Muschkat vun der Insl Samos
Der hot gesacht zum e' Malvasir,
Geb' Acht die Franzose' mit ihr'm Geschwätz
Die krieche' heilig die erschte' Plätz'.

Un' der Bachus der hot 'm Champagner gewunke'
Der war wie e' rechter Stutzer geputzt,
Besetzt mit Topase' die Knöpp am Frack
Un' e' Perle'schnur an sein'm Chapeau claque.

Er is mehr getanzt als daß er is 'gange'
Un' hot noch gesumst so e' Stück vum e' Lied,
Do habe' die annre' gemormlt: wie grob!,
Der hot aach de Großmogl in sein'm Kopp.

Jetz' hot der Bachus gerufe': Tokayer!
Do is der natürlich gar wichtig 'enei',
E' kleener Mann, ganz kuprich un' roth,
Zwee Husare' hinner 'm noch ungrischer Mod'.

D'ruf hot der Bachus nimmer gewunke,
Es war e' langi peinlichi Paus',
Un' er hot sich als bsunne' un' hot sinnirt
Un' wie e' rechter Gelehrter studirt.

Un' wie's halt geht mit dem dumme' Studire',
So kummt 'm der Schlof un' er duslt ei',
Jetz' stellt euch die Angscht un' die Ungeduld vor
Vun dem übrige' diplomatische' Corps. –

»Do gilt es e' Lischt« sächt e' Piesporter Junker
Un' rumplt 'm König durch's offene Maul!
Deß war e' Signal un' Alles will 'nei'
Un' kenner der letschte vergessene sey'.

O Mord un' Spetakl, was war deß e' Drucke',
Die Grieche', wie Feuer vor Aerger un' Zorn
Un' die Franke', die aach nit vun Huzle' gemacht,
Die habe' sich grose Sottise' gesacht.

Ke' Rücksicht, ke' Schonung war do mehr zu finne',
Die Spanier allee' ware' noch im e' Takt
Un' habe' die Lacrimae Christi gebitt',
»Ei gehen Se vor, mir kumme' schun mit.« –

Un' der Bachus der hot als gschlofe' un' gschlofe'
Un' die Herold die habe' gewart't un' gewart't,
Um laut zu verkündige' überall,
Wie dann gefalle' 'm König sei' Wahl.

Jetz' endlich erwacht er, un' wie er's soll sage',
Derwell' dann der erschte vun all' denne' Wein',
So denkt der in Lieb', un' deß war wohl aach gscheut,
»Was soll ich een kränke', sin All' liebe Leut',

»Un' soll ich's dann wege' 'me Wörtche' risquire',
»Daß mancher werd sauer un' kahnig vor Gram?«
Nee, denkt sich der König, un' hot balt nix gsacht,
Als daß 'm die Prüfung Vergnüge' gemacht.

Un' weil er halt gar nix sunscht sage' hot wolle'
Der gute un' liebe un' freundliche Mann,
Un' so weeß mer noch bis uff die Stund' nit gewiß,
Derwell' vun de' Wein' der vornehmschte is.