Was kümmert mich deß weite Meer,
Un' all' sei' Perle' drinn,
'S is Alles nix, mei' Mädche' wär'
Mei' Perle'königinn.

Was kümmr' ich mich um Geld un' Gut,
Ach, wann ich die nit seh',
Wann ich vor lauter Sehnsucht noch,
Vor lauter Lieb' vergeh.

De' ganze liebe lange Tag
Trag' ich ihr Bild mit mir,
Un' kummt die Nacht un' schlof ich ei',
So traam' ich nor vun ihr.

Sie weeß gar nit, wie lieb se is,
Un' ich, der's so gut weeß,
Ich derf ihr's sage' nitemol,
Sunscht werd der Vater bös',

Sunscht fangt die Mutter 's Brumme' a',
Ach Gott, die liebe Leut,
Warum se do so kritlich sin',
Un' sunscht so gut un' g'scheut.

Sie sage' als, du bischt noch nix,
Verdien' dir emol was,
Mer heurath't nit, als wie du meenscht,
Kenn' Heller in der Kaß'.

Ja, ja, 's kann sey', sie habe' recht,
Mer lebt nit umesunscht,
Un' deß Verdiene' geht so zäh',
Deß is e' harti Kunscht.

– Ja, ja, 's wär' doch so übl nit,
Hätt' ich deß Mohre'land,
Mit all' sein'm Gold, do ging's mer wohl
Als anners vun der Hand.

Ja meiner Seel', hätt' ich deß Meer
Un' all' die Perle' drinn,
Do wär' ich wohl um so viel mehr,
Als ich ietz' gar nix bin.

Ja, hätt' ich nor brav Geld un' Gut,
Dernocher wär's gewiß,
Ich derft's ihr sage', wie ich's weeß,
Wie lieb un' gut se is.

O Gott verzeih' mer's, wann ich oft
So übermüthich thu',
Un' wann ich Geld un' Gut veracht'
Un' Land un' Meer drzu.

Ich will's mei' Lebtach nimmer thu',
O helf e' bische' mit,
Daß ich mei' Schätzche' liebe' derf,
O Gott, verdenk mer's nit.