Doch werklich is deß lang nix worre'
Bis endlich faße' se all' de' Bschluß,
Daß mi'm e' Present uff sein' Gebortstag
Der gute Mann überrascht werre' muß.

Jetz' hot halt proponirt e' Jeder
Un' mache' wolle' e' G'schäft d'rmit
Un' was verhandle' for deß G'schenk do,
Natürlich mit eme kleene Profit.

Der ee' 'n Pelzrock, dem er selber
Schun ziemlich abg'fegt hot die Hoor,
Der ee' e' alti Vas' for Blume',
Der ee' e' Duß' vun Semelor,

Und jeder hätt' halt so 'n Schunke'
Wann's 'gange wär' an Mann gebracht,
Doch ufs die letscht werd b'stimmt e' Fäßche'
Voll Wei', un' so war's abgemacht.

Daß aber All' 'n Theel dra' habe'
Hot's g'heese', Jeder bringt e' Boutell'
Un' gießt se in's Fäßche' un', versteht sich,
Der Wei' muß gut sey', klar un' hell.

Un' uff 'n Dag, deß Gschenk gar prächtich
Werd beim Rabbiner presentirt,
Der Mann natürlich war betroffe'
Un' bis zu Thräne' schier gerührt.

»Ihr liebe Leut, ihr seyd zu gütig,
»Ich hab' jo nor mei' Pflicht getha',
»Doch weil's so is, so trinkt aach mit m'r
»Un' zappe' mer's glei' luschtich a'.«

Un wie mer a'gezappt mit Vorsicht
Deß schö' bekränzte Bachushaus,
Do laaft dem ganze Volk zum Schrecke'
Nix als hellichtes Wasser 'raus.

Die Judde' ware' wie verdunnert,
Dann 's is gewest als wär's e' Spott
Un' eener hot aus Schmeichlerei noch
Verzählt g'hat wie mer eigfüllt hot.

Un was war 's Wunner? 'S hot beim Fülle'
E' jeder still bei sich gedenkt
Wer soll dann do drhinner kumme'
Wann er statt Wei' nor Wasser schenkt,

Un' bot so eener wie der anner'
E' Fläschche Wasser mitgebracht,
Die Gränk! die Gränk! – doch der Rabbiner,
Der brave Mann hot freundlich g'sacht:

»Ihr goldich liebe Moseskinner
»Habt wohl gemeent, der pure Wei'
»Der könnt' mer schade', d'rum hot jeder
»Aus Vorsicht Wasser g'schütt' do 'nei',

»Ne Kinner, Ihr seyd gar zu ängstlich
»Ich wees schun selber was mer gut,
»Drum füllt nor aach statt mit dem Gänswei'
»Deß Fäßche' keck mit Rebe'blut.«