Muschkateller un' Traminer
Un' ihr Risling fei' un' zart,
All' so duftich, all' so luschtich,
Seyd noch all' so wie ihr wart!

'Hab' derweil viel' Traube' g'sehe'
In dem heese' Griecheland,
In Corfu un' in Italie',
Ja do wachst aach allerhand.

Große, scheene, gute Traube',
Zuckersüß un' schwer un' reich,
Doch deß liebschte dra' des war mer,
Daß ich hab' gedenkt an euch!

Gel' ihr froocht, was dann die Fremde'
Koche' for 'n Moscht un' Wein',
Ob mer aach, wie bei dem eure'
Kann so froh un' luschtich sey'?

Kinner nee, do müßt' ich lüge',
Nee do sin se weit drvun.
Wie aach herrlich dort der Himml,
'S helft 'n doch ke' deutschi Sunn!

'S is e' Wein so zum Versuche',
Wißt 'hr, so als wie Liqueur,
Loßt sich nit in Humpe' trinke',
Daß drvun zu rede' wär',

Daß mer 'nei' guckt mit Vergnüche',
Drinn sich sucht e' schönri Welt,
Daß mer d'rüber kann vergesse',
Wie die Stunde' knapp gezählt,

Daß mer jung werd, wie e' Jüngling,
Wär's aach lang schun nimmer wohr,
Ohne Sorg' un' unbekümmert
Um die viele dumme Johr.

Kinner, 'will euch gar nit schmeichle',
'Hab's mei' Lebtach nit getha',
Aber do seyd ihr die erschte',
Seyd de' annre' all' vora',

Un' als guter Freund so rōth' ich,
Geh' mer kenn's vun euch do nei'
Kocht nor fort im schöne' Gaarte',
Den ihr habt am deutsche' Rhei'!