Sie habe' kaam de' Dienscht gekennt,
Un wer sei' Sach' getha',
Der hot aach Freede g'hat genung
Un' war nie hinnedra'.

In seine' Gärte' war's erlaubt
Noch Luscht 'erumzugeh',
Do ware' Blume', Bääm un' Obscht
Wahrhaftich wunnerschö'.

Un' war, als wär's gar nit vor ihn,
Hot Alles gern verschenkt,
Un' was er a'geordnt hot,
Als an sei' Leut' gedenkt.

Nor in sei' Schloß, wo er gewohnt,
Im allergröschte Staat,
Wann eener do hot derfe' 'nei,
Deß war e' bsunnri Gnad'.

Jetz war dann unner seine Leut'
E' fauler Hoflaquai,
Un' der hot als zu bitte' g'hat,
Und nix getha' drbei.

Er hot sein' Herrn viel hunnertmol
Versichert seiner Lieb',
Un' daß er so gern bei 'm wär'
Un' so gern bei 'm blieb,

Un' als gebitt' daß halt der Herr
Ihn zu sein'm Liebling nähm,
Un' daß er aach zu ihm in's Schloß
Un' an sei' Dafl käm'.

Statt aber, daß deß gschehe' is,
So hot der Herr gesacht,
Was hoscht dann du im Dienscht getha',
Wie weit hoscht es gebracht?

Maschir' un' geh' mer ans 'm Gsicht,
Dann wer nix thut, als bitt't,
Un' d'rum sei' Complimente' macht,
Verstehscht, den mag ich nit. –

Nit wohr? Ihr sacht, der Herr hot recht,
Jetz' bild't Euch emol ei',
Es thät der Herr der liebe Gott
Un' 's Schloß der Himml sey',

Un' eener, der nix thut, als bet't,
Dersell wär' der Laquai, –
Ob do die Gschicht' wohl anners wär'?
Ich meen', 's wär' eenerlei.