Deß glaab' ich nit, dann wer so reich
Dort wohnt im Himmlshaus,
Der schickt kenn' Sohn so uf die Erd',
Arm, wie e' Kerchemaus.

Un' wo is dann e' Muse'sohn,
Dem's gar so prächtich geht,
Der wär', als wie e' weißi Schnepp,
E' wahri Rarität.

Vor Zeite' ja, do leest mer wohl,
Do war's e' annri Gschicht',
Do war's, wie blank gemünztes Gold,
Hot eener schö' gedicht't,

Do hot sich so e' Mutter noch
Bekümmert um ihr Kind,
Jetz' aber sicht die Abkunft aus,
Als wär' se lauter Wind.

Drum wann die Gschicht' nit gar e' Lüg',
So kann nor Eens noch sey',
Die Muse' habe selber nix
Un' 's geht die Werthschaft ei'.

Un' wann er vum e' Tannebusch
Im Winter Veilcher plückt,
Un' wie wann's Asmannshäuser wär',
Sich am e' Bach entzückt.

Deß is der Vorzug, lieber Freund,
Wann eener e' Poet,
Daß er im schönschte' Wage' fahrt,
Wann er spatzire' geht.

Un' daß er reit't de' Pegasus
Un' doch vum Stuhl nit kummt,
Un' daß er Eng'l singe' hört,
Wann nor e' Käffer summt.

Un' daß er Auschtre' fangt un' Fisch
Im ärmschte Dinte'faß,
Un' daß Kartoffl uf sein'm Disch
For ihn sin Ananas.

Un' so sin aach die Vers sei' Geld,
Do zahlt er gern drmit,
Un' der's nicht gelte' losse' will,
Sich! der versteht's halt nit!