Do is e' Haus, deß g'hört for uns,
Deß richt' mer uns hübsch ei',
Un' plaudre', wie mer halt do drinn
Recht luschtich wolle' sey.

Do is e' Gaul, der is for mich,
E' Rosestock for sie,
E' Wicklkind, deß g'hört uns aach,
Deß heese' mer Marie.

Wohl sächt mer, zwee die sehe' mehr
Als een's, deß kann schun sey',
Doch allemol is 's nit e so,
Deß fallt mer gar oft ei',

Dann grable' an de' Backe' mir
Die Löckcher vun dem Kind,
So werd mer wunnerlich un' is,
Als wär' ich halber blind.

Do seh' ich nix un' deut't se mer
Mi'm Finger freundlich d'ruf,
So tapp' ich niemols noch 'm Bild,
Als uf den Finger 'nuf.

Un' hab' ich se hübsch bei der Hand,
Wie guckt se mich do a',
Deß is e' Bild, bei meiner Seel,
Do hängt mei' Lebe dra'.

Sogar der große Raphael,
So hätt' er kenn's gemolt
Un' hätt' er sich die Engl all'
Vum Himml runner g'holt.