Sagt a' Gsell: »»Was werd denn aufg'führt,
»»G'wiß a' hitzi's Ritterstuck?««
»Freili'! 's hoaßt d' Agnes Bernau'rin
»Wo se s' stürzn vo' der Bruck,

»Hast 'es g'segn amal?« »»Scho' zwoamal,
»»Ho viel woana müssn d'rum,
»»Tause'd! daß ihr gar Niem'd g'holfa,
»»Is scho' 'ganga woltern krumm,

»»Und dem Hauptlump na', dem Vizdum,
»»Dees is gwest des schönsti no',
»»Dem is nix g'schegn, laßn 'n laaffa,
»»Was i' mi' da g'irgert ho'!««

Sagt der Alt': »da hat's mei' Vater
»Anders g'richt' bei'm Faberbräu,
»Wo s' aa' g'schpielt hamm, 'denks als Bua no',
»Bin i' gwest amal dabei.

»Wie s' dees armi Frauerl grausam
»Abag'stößn vo' der Bruck,
»Hätt' ihm aa' derselbi Schlaanggl
»Woaßt es, kloaweis zogn z'ruck,

»Aber da, mei' Vater seli'
»Hat glei' g'schrie'n: 'n Vizdum 'nei!
»'Nei' damit in d' tiefest' Gumpn,
»Denn a Grechtigkeit muaß sey'!

»I' schrei' aa' und All's hat g'schrie'n
»'Hamm die Ritter freili' g'schaugt
»Und den oan' hat's hübsch verdroßn,
»'Hamm scho' g'mirkt, daß's ihm nit taugt,

»Aber 's ganzi Haus hat g'scholtn,
»Z'letzt natürli' ganz verduzt
»Hamm 'n richti' a' Paar Ritter
»Mitt'n 'nei' in d' Dunau g'schutzt!

»Jetz' is na' a' Gaudi g'wesn!
»Denn wann hundertmal oa' sagn,
»'S waar' a' Gschpiel grad, a' Kamedie,
»Ko' ma's dengerscht nit vertragn,

»Und grad wohl 'tho' hats uns alli,
»Daß's' den Spitzbuabn aa' d'erwischt,
»Daß er hat d' ersaufa müss'n,
»Wo'r er gern für ihm 'was g'fischt.«

»»Recht habts, Moasta, sag'n die G'selln,
»»Morg'n muaß's wieder a so sey,
»»Und wann d' Ritter nit dra' woll'n,
»»Schmeiss' mer 'n Vizdum selber 'nei'!««